شهاب محمد - الخرطوم - الخليج 365:
* كل الذين حققوا نجاحات متلاحقة سواء أن كانوا أفراد أو جماعات حققوا ذلك بفضل (الشهية) .
* والشهية أمر مهم يجهله الكثيرين .
* الشهية (بت خال) الطموح .
* أو بالأصح (الشهية والطموح أخوان في الرضاعة) .
* زمان ونحن صغار بتذكر كان في (دواء) خاص بفتح الشهية .
* لما تكون عيان ونفسك قافلة من الأكل بجيبوا ليك الدواء ده .
* بفتح شهيتك عشان تأكل .
* الشهية في الأكل وغير الأكل مهمة جدا .
* النجاح يحتاج لشهية مفتوحة .
* شهية كلما حققت نجاح تنفتح لنجاح آخر .
* الشهية فاتحة (24) ساعة في اليوم .
* داير تنجح وتحقق بطولات لازم تخلي (البلوتوث) حقك فاتح .
* وأكثر ما يعيبنا نحن السودانيين (الاسترخاء) .
* الاسترخاء الذي يحدث أثناء المعركة .
* والاسترخاء هذا هو أكثر ما يجعلنا نتخوف من مباراة النجم القادمة .
* نخاف منها لأن الهلال في حالة استرخاء واضح .
* الهلال مشغول بحاجات ما عندها علاقة بمباراة النجم .
* أربعة أيام ونواجه النجم بينما مجلس الهلال لسه بفاوض في الأجانب ولسه (بحنس) في الوطنيين .
* شد وجذب في تجديد عقودات (بوي ، عمار وبشة) .
* بعد معاناة ودرامات تم التجديد لهم .
* بشة قفل التلفون واعتكف في البيت وطالب بحقوقه القديمة .
* طلبوا منه العودة على أن يستلم متبقى حقوقه (القديمة) قبل مباراة النجم .
* رجع بشة للتمارين وقلبه مشغول وكذلك عقله .
* السمؤال زعلان وداير كاش .
* قال ما بمضى علي الجديد إلا يستلم القديم .
* الحمدلله أمبارح حلوا مشكلة سمؤال .
* باقي ولاء الدين ما معروف مصيرو شنو؟
* جابوا مدافع مالي عملوا ليهو كشف طبي طلع (سليم وما عندو الحبة) قالوا لينا عندو (رباط صليبي) .
* المالي طلب (150) ألف دولار والكاردينال داير لاعب بنصف هذا المبلغ .
* أتخيل الجوطة دي كلها حاصلة ومباراة النجم متبقى لها أقل من أسبوع .
* نصف تشكيلة الهلال مشغولة بتجديد العقد والقروش .
* في حين إنو الكلام ده كان ممكن يتحسم قبل شهرين .
* من يوم اللاعبين ديل وقعوا إقرار بالموافقة على اللعب شهرين مع مضاعفة الراتب من اليوم داك كان ممكن يتم حسم التجديد لهم بكل تفاصيله المالية .
* تخيل لو الهلال حسم أمر المحترفين الأجانب قبل موعد التسجيلات .
* كان ممكن في أول يوم للتسجيلات نسجل الأجانب ونرفعهم للكشف الأفريقي .
* لحدي الآن كان بيكونوا شاركوا في ستة تدريبات .
* لكن وين ؟
* المفاوضات بدأت مع الأجانب بعد انطلاقة التسجيلات .
* علما بأن فترة التسجيلات عشرة أيام .
* محليا .. جمال الوالي ما في وسوداكال في السجن وأحمد هارون راعي هلال الأبيض في السجن ومع ذلك الهلال ما قادر يسيطر علي اللاعبين الوطنيين .
* ما تقدر تعرف ذاتو المشكلة شنو ولا المشكلة وين ؟
* يوم يرشحوا محترف مغربي ويوم تاني يرشحوا برازيلي ويوم غاني ويوم كويتي .
* ونهائي ما بجيبوا سيرة امبومبو .
* مع إنو رئيسنا قال امبومبو ما بدقها مع ناكانا .
* تخبط عجيب .
* وتخدير يحير .
* وكذب يبكي .
* هسه بننصح الكاردينال يسجل نجم هلال الأبيض عبد الرؤوف .
* عليك بهذا اللاعب يا كاردينال .
* عبد الرؤوف لاعب بتفاصيل كبيرة ، يملك قدرات هائلة وخيال ممتاز .
* يقرأ الملعب ويجيد صناعة الباص الطويل والقصير ولاعب فنان .
* أستفيد من عبد الرؤوف في خانة الثعلب .
* نعم محمد عباس مهاجم التبلدي لاعب لا غبار عليه وكذلك المدافع وضاح ولكن عبد الرؤوف هو نجم التسجيلات .
* جدد عقد ولاء وخليهو يمشي إعارة هلال الأبيض جزء من صفقة (عبد الرؤوف ووضاح ومحمد عباس) .
* التسجيلات دايرة شفوت وللأسف الشديد مجلس الهلال الحالي ما فيهو ولا شفت .
* شوف عهد الكاردينال ضاعت من الهلال تشكيلة كاملة (السماني الصاوي ، محمد الرشيد ، محمد آدم بيبو ، التش ، شيبوب ، بكري المدينة ، محمد عبد الرحمن واخيرا الثعلب) .
* بغض النظر عن أهمية هؤلاء اللاعبين وتاثيرهم إلا أن الهلال فرط فيهم بسهولة لا تصدق .
* الآن اقفلوا ملف التسجيلات اليوم قبل الغد .
* اتفرغوا لمباراة النجم وصحصحوا شوية .
* اتركوا الاسترخاء وهذه المهلة والإهمال .
* ونركب صافنات ونجيبة (هلالابية) واصلو الزول بيموت والذكرى تفضل حية .
* و..و..
* والله في .