الارشيف / لايف ستايل

أفضل 18 كتاب عربي في 2018

السنة بتخلص، كتب كتير خلصناها وكتب كتير مستنين نقرأها في السنة الجديدة. في الليست دي جمَّعنالكم أحسن 18 كتاب صدروا في 2018، شاركونا بآرائكم وعرفونا كنتوا بتقروا إيه السنة دي.

*الترتيب مش مقصود بيه الأهمية

أفضل 18 كتاب في 2018:

1)  لا أحد يرثي لقطط المدينة - محمد الحاج

صادرة عن دار التنوير

محمد الحاج سنة 2013 ألف فيلم "فيلا 69"، وبعده بـ 5 سنين أصدر مجموعته القصصية "لا أحد يرثي لقطط المدينة" اللي بيتناول فيها 6 قصص مختلفة، بشكل سينمائي بحت، لست علاقات بيدوروا في القاهرة بعد 2013.

في مجموعته كتب "الحاج" عن العلاقات ما بعد الثورة، بتشعبها والتراكمات الراسخة في أبطالها. ورغم إن الأبطال كلهم من طبقة اجتماعية شبه واحدة، ودواير قريبة، إلا إن القارئ مش هيمل وهو بيلتهم صحفات الرواية القليلة. 

2) المولودة - نادية كامل

صادرة عن دار الكرمة

الكتاب للمخرجة المصرية نادية كامل، بتحكي فيهم "نادية" قصة حياة والدتها ماري إيلي روزنتال، المولودة لأب مصري يهودي وأم إيطالية مسيحية، واللي انضمت للتنظيم السري للحركة الشيوعية واتسجنت قبل ما تشتغل صحفية متخصصة في حقوق المرأة.

عدد ورقات الكتاب أكتر من 500 صفحة وده كبير نسبيًا، وأحيانًا هتحس بملل وأنت بتقرأ لإن الكاتبة اعتمدت على نقل الكلام نصًا من على لسان والدتها، لكن أسلوب السرد هيحسسك إنك رجعت لسنة 1930 وعايش جوا القاهرة مع الأجانب وفي بيوتهم.

المولودة "ماري" محظوظة إنها عاشت حياة ثرية ومليئة بالتفاصيل والتجارب بالشكل ده، واحنا محظوظين إن بنتها قررت تكتب الكتاب ده وتشاركنا حياة والدتها.

3) الخروج من البلاعة - نائل الطوخي

صادرة عن دار الكرمة

بشكل شخصي عندي قناعة إن نائل الطوخي هو كوينتن تارانتينو الأدب العربي بعبثية رواياته وعنفها المربك. في روايته الأخيرة والسادسة "الخروج من البلاعة"، بيحكي نائل قصة "حورية" المعروفة بـ "حرنكش"، الأرملة وأم الطفل المصاب بمرض نفسي، واللي بتدخل في تجربة زواج تانية بتنتهي بقتل جوزها لابنها ثم انتحاره، عشان تكمل حياتها وحيدة مكتئبة وسط أحداث ثورة 25 يناير.

الجماهير عايزة إيه؟ الوعي الجامعي فيها إيه؟ كلها أسئلة بيقدمها "نائل" للقارئ من غير ما يتكبد عناء البحث عن إجابات، وبيكون دورك بعد ما تخلص قراءة إنك تفكر في الوجبة الدسمة اللي قدمهالك في رواية من 500 صفحة.

4) كتاب المواصلات حكايات شخصية لقتل الوقت - عمر طاهر

صادرة عن دار الكرمة

عمر طاهر ليه لون معين في الكتابة بيختلف عليه ناس كتير باعتباره مش "كتابة أدبية". الأكيد إن "عمر" قدر يحجز لنفسه مكانة وسط كتاب كتير في مصر حاليًا، ومع كل إصدار جديد ليه بيتأكد لنا إنه كاتب مجتهد ومواضيع كتبه مختلفة عن المنتشر، زي "إذاعة الأغاني" و"أثر النبي".

كتاب "كتاب المواصلات" إصدار دار الكرمة، عبارة عن مقالات متفرقة بيجمعهم ذكريات "عمر" مع المزيكا والأماكن وتأثره بشخصيات معينة. من ضمن المقالات، "غنوة" اللي بيحكي فيها عن أغنية "زي الهوا" وشاعرها محمد حمزة وملحنها بليغ حمدي. ومقالة "عماد وعمر" اللي بيتكلم فيها عن الشخصيتين الغنائيتين "عماد عبد الحليم" و"عمر فتحي".

5) قريبًا من البهجة - أحمد سمير

صادرة عن دار الشروق

في 2017 صدرت رواية "كل هذا الهراء" للكاتب عز الدين شكري فشير، الرواية خدت شهرة كبيرة في أيام قليلة وناس كتير اشتريتها وهي متحمسة لرواية ثقيلة لفشير. كنت واحدة منهم، خلصتها في 3 أيام، وتقييمي ليها على موقع الجود ريدز كان 3 نجمات بس.

رواية فشير موضوعها كان الثورة وأحداثها، كذلك رواية "قريبًا من البهجة"، اللي تعتبر العمل الروائي الأول لـ "سمير"، وبيتناول موضوع قُتل بحثًا زي ثورة 25 يناير، ما قبل وما بعد. لكن اللطيف والمُبشِّر هو إن المؤلف قدر في أجزاء كتير من الرواية يبعد عن الكلاشيهية والمعالجة السطحية للثورة وكل أطرافها وأحداثها، تحديدًا في الفصول الخاصة بالإخوان.

"ميدان التحرير مملكتها، تمشي منتصبةً، ولأوّل مرة تشعر أنها ليست طريدة، تعرّفني على أصدقائها المتناثرين في الخيام كأنما تستعرض جيشها، تشرح ما أرى من لافتات ومنصّات كأنّها مرشدتي، وحين افترقنا رأيتها تجري في الميدان بسعادة باتجاه خيمتها"

تجربة ممتعة هتدخلك في دائرة من الحنين غير المجدي، بس الرواية نفسها ممتعة وتستحق القراءة.

6) ثلاثة من الشمال - خالد تركي

صادرة عن دار كلمات الكويتية

رواية "ثلاثة من الشمال" للكاتب الكويتي خالد تركي بتسلط الضوء على "البدون" -فصيل اجتماعي في الكويت بيعانوا من مشكلة في إثبات هويتهم الكويتية- ودي مش التجربة الأولى لتسليط الضوء على نفس المشكلة، سبق وقدمها الكاتب الكويتي سعود السنعوسي في رواية "ساق البامبو" واتحولت لمسلسل بنفس الاسم. وده حط "تركي" في منافسة صعبة مع رواية "السنعوسي" الرائعة.

"ليس لديك إلا العائلة، وإذا خذلتها تصبح منبوذًا"

مؤلف رواية "ثلاثة من الشمال" اتسحبت من عائلته الجنسية الكويتية سنة 2000، لما كان عمره 5 سنين بس، بسبب "إتهام" جده بالانتماء لتنظيم قومي محظور في الكويت. اللي حصل ده شكِّل وعي "خالد" وأضاف لروايته مسحة من الذاتية.

7) سيدة الزمالك - أشرف العشماوي

صادرة عن الدار المصرية اللبنانية

" شيكوريل"، مليونير يهودي اتقتل في الزمالك على ايد 4 منهم سواقه، وفيه ست مشتركة معاهم وشجعتهم، هنكتشف إيه تاني؟

"أشرف" هو قاضي مصري وروائي اتنشرت ليه 6 روايات، منهم رواية "تويا" اللي وصلت للقائمة الطويلة لجائزة البوكر سنة 2013، ورواية "البارمان" اللي فازت بجائزة أفضل رواية عربية لسنة 2014 من الهيئة المصرية العامة للكتاب.

8) كيف تؤلف كتابك الأول - محمد معتوق الحسين

لو ناوي تكتب كتاب أو صحابك بيقولوا لك إنك لازم تكتب رواية، الكتاب ده هيفيدك ويديك شوية نقط تحطك على أول الطريق، والميزة فيه إنه مقدم من كاتب عربي -تحديدًا سعودي- عارف الوضع الأدبي في الوطن العربي والصعوبات اللي هتقابلها، على عكس معظم الكتب المنتشرة اللي بتكون في الأصل أجنبية بس مترجمة.

9) الحالة الحرجة للمدعو ك - عزيز محمد

صادرة عن دار التنوير للنشر

بطل الرواية شاب مش منسجم مع محيطه، سواء في البيت أو في الشغل أو في أي مكان، بتبدأ تظهر عليه أعراض مرض، لحد ما يكتشف إنه مصاب بالسرطان، فيستخدم مرضه للحصول على كل حاجة.

"سأقولها كلما تجاوز أحد الطابور الذي أقف فيه، أو تجشأ أحدهم بجانبي، أو حين يحك أحدهم عضوه على الملأ. وسأكون محقاً بها كلما ركضت خلف معاملة حكومية، أو أوقفني شرطي المرور، أو تأخر طلبي في المطعم. وإذا رفضتني فتاة سأقول: ولكن كيف؟ أنا مصاب بالسرطان!"

10) حدث في برلين - هشام الخشن

صدر عن مكتبة الدار العربية للكتاب

الباحثة الإسرائيلية في شؤون الشرق الأوسط، إيلا آفيك، قالت عن الرواية المصرية دي: "على خلفية تجاهل أحداث الهولوكوست في الخطاب العام في العالم العربي، نشر رواية مصرية هي الأولى عن الهولوكوست يعد حدثا استثنائيًا"، في مقالتها على موقع "منتدى التفكير الإقليمي".

الرواية أحداثها بتبدأ يوم 8 نوفمبر 1938م، ودي الليلة المعروفة في ألمانيا باسم "ليلة الكريستال"، اللي بدأت فيها موجة عنف ضد اليهود تحت حكم أدولف هتلر. في الليلة دي بيتعرض صاحب محل الرهونات اليهودي "مائير" وأسرته للاعتداء، لكن جارهم ضابط الشرطة الألماني "شميدت" بيدافع عن الأسرة، بس بسبب التعاطف ده هيفقد عمله.

في بداية الرواية كتب "الخشن": "لو استرقنا السمع، سيأتينا من بعيد أنين ضحايا البشر عبر التاريخ، يشكون ظلم نظرائهم الذين استظلوا بوجوبية ما اقترفوه من بشاعات، سيؤرقنا الأنين بعض الوقت، ثم سيخفت سريعا حين تحيل ذاكرتنا أولئك الضحايا لأرقام مسلسلة في مدونة الزمن".

11) الخائفون - ديما ونوس

صادرة عن دار الآداب للنشر والتوزيع

الرواية بتدور حوالين "سُليمى" المرتبكة قدام الأوراق اللي أرسلها ليها "نسيم"، بس بتكتشف وهي بتلتهمها كلمة كلمة، إنها أقرب لسيرة امرأة مصنوعة من الخوف، بالظبط زيها. الرواية تعتبر ثنائية المواطن والسلطة، وبتفضح العلاقة الشاذة بينهم، تحديدًا تيمة الخوف المرتبطة بحياة الفرد والمجتمع.

"اليوم قبل قليل تحديداً، على الحدود السورية اللبنانية مات بابا"

12) حرب الكلب الثانية - إبراهيم نصر الله

صادرة عن الدار العربية للعلوم ناشرون

الرواية الفائزة بجائزة البوكر لسنة 2018، تصنيفها خيال علمي، وبيتكلم الكاتب فيها عن نزعة التوحش اللي بتسود المجتمعات، واستشراء النزعة المادية بعيدًا عن القيم الأخلاقية.

الكاتب الفلسطيني قال إن أجمل ما في "حرب الكلب الثانية"، وهي أول عمل له كرواية خيال علمي، "أنها أيقظت مناطق جديدة في عقلي وخيالي، وطرحت عليّ أسئلة لم أطرحها على نفسي من قبل، فكان علي أن أؤثث المستقبل باختراعات جديدة غير موجودة اليوم".

- لقد لاحظتُ منذ يومين أن الناس لم تعد تتعارك وتختلف لتجرح، بل لتقتل.

- تقتل نهائيًا؟

- نهائيًا، كما لو أنهم متفقون على قاعدة تقول: من مكان الشجار إلى المقبرة

- دون المرور بالمستشفى؟

- دون المرور بالمستشفى.

- هل يحاولون التخّفف من مصاريف العلاج؟

- لا أظن المسألة كذلك، لقد قرّروا التخفّف ممن يشبهونهم إلى الأبد، بعد أن كانوا قد تخففوا ممن يختلفون عنهم في الماضي.

13) أولاد حارتنا: سيرة الرواية المحرمة - محمد شعير

الصادرة عن دار العين للنشر

الكتاب أشبه برحلة بحثية بيقودها "شعير" وسط تفاصيل رواية "أولاد حارتنا"، ظروف كتابتها والأحداث السياسية والاجتماعية المصاحبة ليها واللي وصلت واحد من المتطرفين لمحاولة قتل نجيب محفوظ بسبب "أولاد حارتنا".

الـ 300 صفحة ممكن تعتبرهم تحقيق صحفي طويل، هتعرف فيه نجيب محفوظ أكتر وترتبط بيه وتتعلم من تطوره ككاتب.

14) طرق الرب - شادي لويس

الصادرة عن دار الكتب خان

الرواية بتدور حوالين شاب -ممكن يبقى الكاتب نفسه وممكن يبقى شخص تاني- مسيحي مصري حياته محكومة بالكنيسة وبالورق اللي بيصدر منها. زي شهادة خلو موانع اللي بتسمح ليه بالزواج، اللي بتضطره لمواجهة تعقيدات بيروقراطية، وللمثول قدام قس في كنيسة في جلسات اعتراف منتظمة، عشان يبت في أمره.

15) وللجاسوسية فنون - د. نبيل فاروق

الصادرة من دار سبارك للنشر والتوزيع

من "رجل المستحيل" لـ "وللجاسوسية فنون"، رجع "نبيل" تاني يكلمنا عن الجواسيس وحروب الجيل الرابع والخامس والسادس. لو كنت بتحبه زمان الكتاب هيعجبك ويرجعك عيل بشورت، ولو ماكنتش بتحب كتاباته أديلها فرصة تانية.

16) النجدي - طالب الرفاعي

الصادرة عن دار ذات السلاسل

الرواية للكاتب الكويتي طالب الرفاعي، بتهتم بالتراث الكويتي عن طريق توثيق سيرة على النجدي، الأسطورة البحرية، صاحب الشأن الكبير في الخليج.

في الرواية هتلاقي نفسك محاصر بكم معلومات هائل، ومقولات مدونات وآراء مختلفة كتير، بس كله في سياق شيّق. من المعلومات اللي هتعرفها، إن أول مرة اتصدرت شحنة بترول كانت سنة ١٩٤٦، وهتفهم مصطلحات البحارة، وطرق إعداد السفن للإبحار، كل المعلومات دي مجتمعة في مشهد سينمائي درامي موثق بالساعات.

17) مدينة الحوائط اللانهائية - طارق إمام

صادرة عن الدار المصرية اللبنانية

الكتاب بيضم 36 نص بيدوروا فى أجواء عجائبية لمدينة متخيلة، بيخترع "إمام" في كتابه مدينة متخيلة، "مدينة الحوائط"، ليها سمات فنية محددة، مثلًا الشوارع متاهية وضيقة مش هيقدر شخصين يعدوا فيها من جنب بعض، بيوتها مافيهاش أبواب أو أسقف، وبتطل على بحر مصنوع من الدموع!

18) الكتابة والحقيقة - بثينى العيسى

صادرة عن الدار العربية للعلوم ودار تنوير

"بثينة" بتعتبره هدية منها للكتاب الشباب اللي بيطمحوا يقدموا عمل أدبي، بتعرفهم فيها يعني إيه سرد وازاي يغلب على الحوار من غير ما تبقى الرواية مملة.

كانت هذه تفاصيل خبر أفضل 18 كتاب عربي في 2018 لهذا اليوم نرجوا بأن نكون قد وفقنا بإعطائك التفاصيل والمعلومات الكاملة ولمتابعة جميع أخبارنا يمكنك الإشتراك في نظام التنبيهات او في احد أنظمتنا المختلفة لتزويدك بكل ما هو جديد.

كما تَجْدَرُ الأشاراة بأن الخبر الأصلي قد تم نشرة ومتواجد على الفاصلة وقد قام فريق التحرير في الخليج 365 بالتاكد منه وربما تم التعديل علية وربما قد يكون تم نقله بالكامل اوالاقتباس منه ويمكنك قراءة ومتابعة مستجدادت هذا الخبر من مصدره الاساسي.

Advertisements

قد تقرأ أيضا